Húsasmiður

Danskt heiti: Træfagenes byggeuddannelse, tømrer

Útbúgvingarlongd: 4 ár

Skúlagongd: Føroyar. Í alt 55 vikur, býttar á 4 skúlaskeið
Upptøkukrav: Skal hava fylgt undirvísingini til fráfaringarroynd fólkaskúlans (9. flokk)
Útbúgvingarlongd við miðnám/FHS: 4 ár. Til ber at søkja skúlan um frítøku fyri almennu lærugreinarnar
Lønar- og arbeiðsviðurskifti: Handverkarafeløgini
Eftir lokna útbúgving: Sveinabræv

Ein húsasmiður, ella ein timburmaður, fæst í høvuðsheitum við at smíða hús. Talan kann vera um sethús og aðrar bygningar, umframt onnur byggiarbeiði.

Arbeiðið fevnir m.a. um gólv, útveggir, takverk og at seta upp formar. Húsasmiðurin arbeiðir eisini við at bjálva, klæða, seta vindeygu og hurðar í, umframt at seta køkseindir og aðrar lidnar bygningslutir upp.

Hvar er skúlagongdin?

Í lærutíðini verður skift millum verkliga læru á góðkendum læruplássi og skúlagongd, sum fyri húsasmiðin kann fara fram á TSK í Klaksvík ella á Glasir.

UM ÚTBÚGVINGINA

Bygnaður av útbúgving

Í lærutíðini verður skift ímillum verkliga læru á góðkendum læruplássi og skúlagongd á yrkisskúla, sum er í Tórshavn ella í Klaksvík. Her er eitt dømi:

Í læru

1. skeið
20 vikur

2. skeið
20 vikur

3. skeið
10 vikur

Sveinaroynd
5 vikur
 

Hvat er ein yrkisútbúgving

Yrkisútbúgvingar eru skiftisútbúgvingar, har tú skiftir ímillum at vera í læru/arbeiða á einum arbeiðsplássi og at ganga í skúla.

Yrkisútbúgvingar fáast við at lærusáttmáli verður gjørdur ímillum ein arbeiðsgevara í yrkinum og ein, sum ynskir at gerast lærlingur.

Ymisk viðurskiftir eru, sum partarnir eiga at kunna seg um, áðrenn lærusáttmáli verður undirskrivaður.

Niðanfyri er stutt kunning um ymisk viðurskiftir ísv. at lærusáttmáli verður undirskrivaður og ynskir tú meiri vitan, ber til at lesa aðrastaðni á heimasíðuni ella at lesa námsskipanina, sum er viðfest niðast.

Hvussu gerist eg húsasmiður?

Tað eru tvær inngongdir til eina útbúgving sum húsasmiður. Tú kanst antin:

  • gera sáttmála við arbeiðsgevara, ella
  • søkja inn á skúla

Til ber at taka 1. og 2. skúlaskeið uttan sáttmála, men eftir tað slepst ikki víðari í útbúgvingini uttan at gera sáttmála við arbeiðsgevara. Hevur tú tikið skúlagongdina áðrenn tú gert sáttmála við lærumeistara, verður samlaða sáttmálatíðin stytt við 40 vikunum fyri 1. og 2. skúlaskeið.

Inngongd við sáttmála:

Ynskir tú at gera sáttmála beinanvegin, heitir tú á arbeiðsgevara í yrkinum, um at gera sáttmála tykkara millum. Tá bindur tú teg til setanina/arbeiðsgevaran til útbúgvingin er liðug eftir treytunum í sáttmálanum, sum td. at tú arbeiðir 8-16 hvønn dag og annars livir upp til skyldurnar í sáttmálanum.

Arbeiðsgevarin hinvegin, bindur seg til at læra teg alt tað fakliga, ið er kravt, so at tú hevur nomið tær førleikamálini, sum eru lýst í útbúgvingarkunngerðini og verður før/ur fyri at standa útbúgvingina og sveinaroyndina áðrenn lærutíðin er av.

Gerst tú sáttmála við lærumeistara beinanvegin, byrjar tú oftast í læru, til skúlin, har tú skalt taka skúlagongdina, kallar teg inn á eitt skúlaskeið.

Inngongd uttan sáttmála:

Til ber at fara undir eina yrkisútbúgving beinleiðis eftir 9. flokk. Tú kanst byrja eina yrkisútbúgving við at søkja inn á 1. skúlaskeið á einum av miðnámsskúlunum, sum bjóða útbúgvingina.

Søkir tú beinleiðis inn á skúla uttan lærusáttmála, skal søkjast innan umsóknarfreistina hjá skúlunum. Vanliga liggur freistin um hálvan mars. Skúlarnir gera á hvørjum ári vart við, tá klárt er at søkja.

1. skúlaskeið tekur 20 vikur og byrjar vanliga í august á hvørjum ári. Um tú heldur fram á 2. skúlaskeiði, byrjar tað vanliga í januar og tekur eisini 20 vikur.

Tá tú hevur tikið eitt ár við skúlagongd, slepst ikki víðari, uttan at tú tá gerst lærusáttmála við eitt arbeiðspláss.

Hvat læri eg?

Útbúgvingarkunngerðin fyri timbur sigur, at førleikarnir, lærlingurin skal hava ognað sær við útbúgvingarlok, eru hesir:

1)   At hallmáta og hæddarmáta øki, áseta kotur og vatnrættar og loddrættar linjur og velja mátitól,

2)   at innrætta eitt byggipláss við atliti at arbeiðsumhvørvi, trygd, gonguvegum, ruskskiljing, veðurviðurskiftum og trivnaðarhentleikum,

3)   at luttaka í fyribyrgjandi trygdararbeiði og í fyriskipanini av hesum á arbeiðsplássinum,

4)   at lesa vegleiðingar og trygdarvegleiðingar,

5)   at gera mongdarútrokningar av tilfari,

6)   at gera hondtekningar og skitsur,

7)   at samskifta við viðskiftafólk,

8)   at meta um dimensiónir, tilfar, amboð og trygdarútgerð,

9)   at leggja út undirsløg,

10) at evna til og byggja upp útvegg við klædningi, seta upp klædning á skjøldur og evna til vindskeiðir, úthang og takskegg,

11) at snøra upp, avbinda, evna til, byggja upp yvirtrom,

12) at leggja ymisk sløg av tróðri,

13) at veksla út, seta takvindeygu í og arbeiða við inndekningum til ymisk taksnið,

14) at evna til og leggja skottrennu,

15) at lekta eina yvirtrom til ávís tøk,

16) at evna til takverk við takskeggi og skálkum,

17) at seta í innhurðar og úthurðar og vindeygu við tilsetningum, inndekningum og fugum,

18) at byggja upp og klæða innanveggir,

19) at byggja upp gólv og veggir í einum vátrúmi,

20) at leggja trægólv við parket ella brettum og øðrum líknandi tilfari,

21) at seta upp loft og undirlag til loft,

22) at seta upp fast innbúgv,

23) at vísa ávísan kunnleika til at seta upp trappur, og

24) at umvæla rotskaðar og soppaskaðar.

Harafturat skal lærlingurin hava kunnleika til siðbundna føroyska byggilist, so sum flagtekja og triðingsreising. Eisini skal næmingurin kenna til ymisk sløg av betongi og hava innlit í kloak- og rørviðurskifti.

Áðrenn sáttmálin verður undirskrivaður

Ymisk viðurskiftir eru, sum partarnir eiga at gera sær greitt, áðrenn sáttmálin verður undirskrivaður.

Lærlingurin eigur at vita, hvat hann skal læra ígjøgnum lærutíðina, hvussu long lærutíðin er, hvar skúlagongdin er, hvønn sáttmála/fakfelag yrkið hoyrir til, hvør lønin er og um sáttmálin inniheldur rætt til løn undir sjúku ella um lærlingurin skal søkja um sjúkradagpening undir sjúku.

Lærumeistarin skal hava læruplássgóðkenning áðrenn hann kann taka lærling. Harafturat eigur lærumeistarin at kunna seg um lærumálini og tryggja sær, at fyritøkan fær lært lærlingin tað, sum er kravt. Lærumeistarin skal eisini tryggja sær, at faklært fólk er til at taka sær av lærlinginum.

Sum húsasmiður er umráðandi at hava í huga, at tú hevur:

  • Eina góða heilsu og ert væl fyri kroppsliga, tí arbeiði er fysiskt tungt
  • Hegni og hug at brúka tínar hendur
  • Hug at arbeiða úti í skiftandi veðri og ert før/ur fyri at arbeiða í hæddum (td. tá tøk skulu skiftast)
  • Skil fyri rúmd og formum
  • Fokus á dygd og smálutir
  • Áhuga fyri umhvørvinum
  • Hug at tosa við kundar og ert tænastusinnað/ur
  • Góð samstarvsevnir
  • Hug at nýta KT-amboð
Royndartíð 6 mánaðir

Lærusáttmálin partarnir undirskriva sína millum, er galdandi til lærlingurin hevur staðið sveinaroyndina og fyri at ógilda sáttmálan krevst, at báðir partar skriva undir. Tó er ein royndartíð á 6 mánaðar ásett, har báðir partar kunnu siga sáttmálan upp, eisini hóast teir ikki eru samdir um avgerðina.

Royndartíðin á 6 mánaðir er einans galdandi fyri tíðina á arbeiðsplássinum. Tað merkir, at er skúlagongd partur av teimum fyrstu 6 mánaðunum, verður hendan tíðin løgd afturat royndartíðini á 6 mánaðir.

Hetta er ásett fyri at geva pørtunum umhugsunartíð. Eftir at lærlingurin hevur verið á læruplássinum í 6 mánaðir, hevur hvørgin parturin møguleika fyri at siga sáttmálan upp, uttan so at sáttmálin verður álvarsliga misrøktur av øðrum partinum. Tó hava partarnir møguleika fyri at siga sáttmálan upp, um teir eru samdir um avgerðina og báðir undirskriva uppsøgnina.

Skal sáttmálin sigast upp, verður hetta gjørt við at útfylla oyðublaðið "Umsókn um broyting í lærusáttmála" og senda Yrkisdeplinum.

Lærutíðin

Tað er umráðandi, at lærusáttmálin verður sendur Yrkisdeplinum beint sum hann er undirskrivaður, tí læran kann í fyrsta lagi byrja frá tí degi, Yrkisdepilin hevur móttikið sáttmálan. Hetta er einans galdandi, um sáttmálin er rætt útfyltur frá byrjan og allar neyðugar upplýsingar fylgja við sáttmálanum.

Er sáttmálin ikki rætt útfyltur ella mangla upplýsingar ella skjalprógv, ið hoyra til sáttmálan, er sáttmálin ikki endaliga góðkendur, fyrr enn Yrkisdepilin hevur móttikið øll skjalprógv. Heitir Yrkisdepilin á partarnar um at broyta ella rætta í sáttmálanum, ella at senda nýggj skjalprógv, skal hetta gerast beinanvegin. Verður hetta ikki gjørt beinanvegin kann tað hava við sær, at sáttmálin ikki verður roknaður sum góðkendur, fyrr enn frá tí løtu, at Yrkisdepilin hevur móttikið manglandi upplýsingarnar.

Tá sáttmálin er góðkendur, verður hann sendur lærlingi og lærumeistara aftur. Er talan  um lærling undir 18 ár, verður sáttmálin eisini sendur verjanum.

Lærutíðin er ymisk fyri hvørja útbúgving og avhongur av, um tú hevur aðra útbúgving, ið hevur partvíst samanfallandi lærdóm við útbúgvingina tú fert undir. Handverksútbúgvingarnar eru tær flestu so mikið sermerktar, at lærutíðin ikki broytist nógv, uttan so at tú hevur tikið skúlaskeiðini til útbúgvingina, áðrenn læran byrjar ella hevur arbeitt nógv ár innanfyri yrkið, sum tú fert í læru í. Eitt nú verður lærutíðin ikki stytt, hóast tú hevur eina miðnámsútbúgving, men tú sleppur undan at taka somu lærugreinarnar umaftur, um tú hevur tær frammanundan.

Hevur tú arbeitt innan yrkið í nógv ár við viðkomandi uppgávum, kann søkjast um stytting í lærusáttmálanum. Fyri at fáa játtað stytting, skal skjalprógv fylgja við, har lýst verður:

  • Byrjanar- og endadato fyri setan
  • Tímar um vikuna
  • Stutt lýsing av teimum uppgávum, sum tú hevur arbeitt við
  • Skjalið skal vera undirskrivað av arbeiðsgevaranum, har tú hevur arbeitt

Lærutíðin, ið er ásett í sáttmálanum, fevnir um læruna á arbeiðsplássinum, skúlagongd og feriu.

Í ávísum førum ber til at leingja sáttmálan. Les meira um hetta á síðunum "Til lærlingar" ella "Til lærupláss". 

Skúlagongdin

Í einari føroyskari yrkisútbúgving verður skift ímillum læru og skúlagongd ígjøgnum alla útbúgvingina.

Skúlagongd: skúlagongdin kann fara fram í Tórshavn ella í Klaksvík. 55 vikur av teimum 4 læruárunum eru skúlagongd:

  • 1. skúlaskeið er 20 vikur
  • 2. skúlaskeið er 20 vikur
  • 3. skúlaskeið er 10 vikur og
  • sveinaroyndin er 5 vikur

Stutt kann sigast, at 1. skúlaskeið hevur størsta partin av almennu fakunum og eitt sindur av verkstaðslæru. Almenn fak eru fak so sum føroyskt, enskt og støddfrøði. 

2. skúlaskeið er yrkisrættað í størri mun - bert eitt alment fak liggur í hesum skúlaskeiðinum. Á 2. skúlaskeiði verður undirvíst í yrkisfakunum, eins og verkstaðstímarnir eru fleiri.

Á 3. skúlaskeiði byrjar fyrireikingin til sveinaroyndina og eru allir tímar yrkisrættaðir.

Sveinaroyndarskeiðið er til at gera sveinaroyndina, ið fevnir um ein ástøðiligan part og ein verkligan part.

Tá tú hevur staðið sveinaroyndina fært tú Sveinabræv og kanst kalla teg timburmann og yrkislærdan.

Neyvt yvirlit yvir fak og tímatal sæst í námsskipanini fyri yrkið.

Skúlagongdin fevnir um hesar yrkislærugreinar:

1)   Amboðslæra

2)   Arbeiðsumhvørvi

3)   Betong og forskalling

4)   Byggipláss

5)   Eldsløkking

6)   Fyrstahjálp

7)   Góðskutilvitan

8)   Hæddarmáta og avseta

9)   Ísetan av hurðum og vindeygum

10) Konstruktiónir

11) Snið, skap og litir

12) Tekning

13) Tilfarslæra

14) Trappur, rimaverk og svalar

og hesar almennu lærugreinar:

1) Alisfrøði E

2) Enskt E

3) Føroyskt E

4) Støddfrøði E

5) Vallærugrein E

Ert tú 30+

Ert tú 30 ár ella eldri og hevur í minsta lagi fimm ára starvsroyndir, kanst tú verða førleikamett/ur upp ímóti einari føroyskari handverkaraútbúgving.

Ein førleikameting kann vera við til at stytta munandi um lærutíðina, um hon vísir, at tú hevur viðkomandi førleikar innan yrkið, ið tú hevur valt at útbúgva teg í.

Ein og hvør, sum lýkur treytirnar, kann søkja Yrkisdepilin um at verða førleikamettur. Ein førleikameting er ein tilgongd, ið fevnir um innsavnan og skráseting av upplýsingum um royndir og førleikar, ið ein umsøkjari hevur. Tað er umsøkjarin, ið hevur ábyrgdina av at útvega allar neyðugar og viðkomandi upplýsingar. Upplýsingarnar verða fingnar til vega við samrøðu, váttanum, prógvum, uppgávuloysnum o.s.fr. Ein meting verður gjørd av innsavnaðu og skrásettu førleikunum. Henda meting tekur altíð støði í einari viðkomandi føroyskari útbúgving, sum umsøkjarin ætlar sær at fara undir. Førleikametingin endar við einari niðurstøðu, sum er eitt løggildugt skjal, ið prógvar tínar førleikar.

Les meira um førleikameting innan tær føroysku yrkisútbúgvingarnar aðrastaðni á heimasíðuni hjá Yrkisdeplinum. Ella set teg í samband við vegleiðingina í Yrkisdeplinum, at fáa nærri kunning um tínar møguleikar við førleikameting.

Løn undir útbúgvingini

Lærlingar fáa fasta løn ígjøgnum lærutíðina, bæði tá teir eru til arbeiðis og tá teir eru í skúla. Lærlingar eru fevndir av sáttmála ímillum arbeiðsgevarar og fakfeløg, sum eru partar á arbeiðsmarknaðinum. Minstalønin, sum lærlingur kann lønast eftir, er ásett í sáttmálanum ella lønartalvuni, sum hoyrir til sáttmálan.

Lærumeistarin fær endurrindað part av lønini, sum lærlingurin fær, tá hann er í skúla, við at søkja Yrkisdepilin um endurgjald.

Partarnir hava altíð møguleika at áseta hægri løn. Tá skal hetta eyðmerkjast í sáttmálanum. Endurgjaldið, ið lærumeistarin kann søkja Yrkisdepilin um at fáa endurrindað ígjøgnum lærutíðina, verður roknað av lærlingalønini og ikki av faktisku lønini, ið arbeiðsgevari rindar.

Nýggjastu sáttmálin og lønartalvan eru altíð at finna á heimasíðuni hjá Vinnuhúsinum: www.industry.fo.

Ert tú í læru hjá eitt nú Landsverk ella øðrum almennum stovni, ert tú lønt/ur eftir sáttmála ímillum handverkarafeløgini og Fíggjarmálaráðið. Lønartalvan er at finna á heimasíðuni hjá Fíggjarmálaráðnum undir Lønardeildini: www.fmr.fo.

Søgulig gongd

Tillagingar í kunngerð 2023

- Dagført førleikamálini í útbúgvingini 
- Heiti á útbúgvingini er broytt til Húsasmiður. Fyrrverandi heiti var Timburmaður

Framtíðarmøguleikar

Tá ið tú ert liðug/ur við útbúgvingina kanst tú arbeiða sum húsasmiður, stovna egna fyritøku ella fara undir framhaldslesna, eitt nú byggitøkni  ella byggifrøðing, sum er ein professiónsbachelor. Les meira á glasir.fo, sí her

Ynskir tú at halda á fram til verkfrøði er neyðugt at taka ávís fak á miðnámsstigi, áðrenn tú kanst lesa víðari.

Ynskir tú at vita meira neyvt, hvørji krøvini til víðari lestur eru, kanst tú seta teg í samband við Vegleiðingarstovuna, www.vegleiðingarstovan.fo, ein av vegleiðarunum á miðnámsskúlunum ella skúlan tú umhugsar at søkja inn á, fyri at fáa neyvt svar.

Hagtøl

Verður uppdaterað sjálvvirkandi vikuliga

Sí námsskipan

LÆRUPLÁSS

Hvar kann eg søkja lærupláss?

Her er listi yvir lærupláss, sum í løtuni hava – ella hava havt - lærlingar í læru innan yrkið. Virkir og stovnar, sum ynskja at taka lærlingar í læru, skulu søkja um at fáa eina læruplássgóðkenning innan tey yrki, sum læruplássið kann bjóða.