29/08/2018

Skeið í førleikameting fyri starvsfólki innan yrkisútbúgvingar

Dagarnar 17.-19. september skipar Yrkisdepilin fyri skeiði í førleikameting fyri starvsfólki innan yrkisútbúgvingarnar og í vinnuni.

Skeiðið er liður í, at skipað førleikameting er sett í verki innan allar føroyskar útbúgvingar. Nú farið verður undir at fremja førleikameting í verki, er umráðandi at starvsfólk, ið starvast innan ymisk øki í okkara útbúgvingarskipan, eru førleikament og trygt evna at bera eina førleikametingartilgongd á mál.

Skeiðsluttakararnir fáa innlit í, hvussu arbeitt hevur verið við at fyrireika førleikameting í Føroyum, umframt hvussu førleikametingin hevur ment seg í Evropa, serliga Norðurlondum. Luttakararnir fáa innlit í, hvussu arbeitt verður yvirskipað og ítøkiliga við førleikameting og vegleiðing í Finnlandi og Íslandi, og dømi úr øðrum norðurlondum og Evropa verða umrødd.

Sjóneykan verður sett á einstaklingin, sum skal ígjøgnum eina førleikametingartilgongd, og luttakararnir fáa høvi at vísa í verki, hvussu ein slík tilgongd kann verða skipað. Í hesum sambandi er umráðandi, at starvsfólk, ið fáast við førleikameting, bæði í umsiting, undirvísing og á arbeiðsplássum, duga at leiðbeina og svara spurningum frá tí einstaka, ið vil førleikametast.

Skeiðsluttakararnir fáa eisini høvi til at umrøða og viðgera, hvussu ein føroysk førleikametingarskipan skal síggja út, og hvussu hon kann verða ment.

 

Royndir skeiðsleiðarar

Skeiðsleiðarar verða Fjóla María Lárusdóttir og Haukur Harðarson úr Íslandi, og Anni Karttunen úr Finnlandi. Tey hava øll trý verið í Føroyum áður, har tey hava tikið lut á ráðstevnum og havt framløgur. Tey hava servitan innan førleikameting og vegleiðing, og eru øll limir í valideringsnetverkinum hjá NVL.

Harumframt luttaka John Dalsgarð samskipari og Maiken Skarðenni vegleiðari í Yrkisdeplinum sum hjálparfólk í sambandi við skeiðið.

Skeiðið verður hildið í hølunum hjá Starvsmannafelagnum í J.H. Schrøtersgøtu í Havn, og byrjar kl. 9 mánamorgunin 17. September.

Skeiðið er ókeypis og tekning fer fram við at senda teldupost til Maiken Skarðenni: maikens@yrkisdepilin.fo

 

Skeið í førleikameting fyri starvsfólki innan yrkisútbúgvingar